Mótið hafið.

Hér er alltaf sama blíðviðrið, sól og hiti rúmlega 30 stig.

Í dag hófst mótið og í fyrstu umferð fengum við mjög sterka Pólska sveit og er skemmst frá því að segja að fljótlega töpuðust skákirnar á fyrstu þremur borðunum. Kristófer, sem tefldi á fjórða borði sat lengi við og staðan virkaði jafnteflisleg, en undir kvöldmat þurfti hann að játa sig sigraðann og 0-4 tap var staðreynd. Næsta umferð er á morgun og þá mætum við sveit frá Rússlandi.

Mótið að hefjast

Loksins er fyrsti keppnisdagur runninn upp og allir í góðum gír, búnir að sóla sig og menn orðnir mismunandi rauðir. Ekki er enn ljóst hverjum við mætum í fyrstu umferð, þar sem ekki verður dregið fyrr en eftir setningu mótsins, sem hefst kl. 14:00 að staðartíma (17:00 að íslenskum tíma). Umferðin byrjar síðan kl. 15:00.
Búið er að velja liðið sem teflir í dag og er það þannig skipað:
1. Nökkvi Sverrisson
2. Bjartur Týr Ólafsson
3. Alexander Gautason
4. Kristófer Gautason
Varamaður er Ólafur Freyr Ólafsson.
Í gær var liðstjórafundur og fór hann að mestu fram á rússnesku og búlgörsku. Skrítið hversu mikið er hægt að tala á þessum tungumálum og síðan koma 1-2. setningar á ensku frá þýðandanum sem útskýra allt að 10 mínútna samræður á rússnesku.

Aðstæður hér í Varna eru frábærar. Gistingin er eins og best verður á kosið og jafnvel maturinn sæmilegur. Mætti vera aðeins meiri fjölbreytni. Síðustu tvö kvöld hefur verið það sama í matinn.

Nú er kominn tími til að koma sér á skákstað og hlusta á nokkrar ræður á framandi málum og kannski fáum við einhverja þýðingu inn á milli.

Um mótið

Evrópumót grunnskólasveita fer fram í 2. skiptið dagana 21-28 júní.

Teflt verður í Varna við Svartahafsströnd Búlgaríu.

Lið Barnaskóla Vestmannaeyja tefldi í flokki 12 ára og yngri í fyrra og hafnaði í 5. sæti.

Lið Grunnskóla Vestmannaeyja teflir nú í flokki 14. ára og yngri, og er þannig skipað (í stafrófsröð)

Alexander Gautason 13 ára
Bjartur Týr Ólafsson 13 ára
Kristófer Gautason 10 ára
Nökkvi Sverrisson 12 ára
Ólafur Freyr Ólafsson 11 ára

Þrír af liðsmönnum sveitarinnar tóku þátt í mótinu í fyrra, þeir Alexander, Nökkvi og Kristófer.

Önnur sveit frá Íslandi teflir einnig í mótinu. Laugarlækjaskóli teflir í flokki 16 ára og yngri.

Evrópumót í Varna

Nú eru einungis 5 dagar fram að ferðinni á Evrópumót grunnskólasveita í Varna. Hugur er í strákunum og liggur við að sumir þeirra telji klst. fram að brottför. Nokkuð er víst að eitt það fyrsta sem gert verður, er að fara á hótelið okkar frá því fyrra - Journalist. Ekki er víst að allir kunni að meta það, en trúlega verða einhverjir hrifnir af sundlauginni í hótelgarðinum.